Nirxandina Berhemên Mehmed Uzun

Min navê Rehmetî Mehmed Uzunî ji kovara "Rizgarî"yê bihîstibû. Min hemû hejmarên kovarê dikirîn û dixwendin. Navê Mehmed Uzunî wekî berpirsê nivîsaran ê kovarê hatibû destnîşankirin. Paşê di kovara "Rizgariya Kurdistanê” de min gotar û helbestên wî xwendin. Wî wê demê bi nasnavê "Ferzende Baran"î gotar û helbest dinivîsandin. Paşê romana xwe ya yekem “Tu” nivîsî û weşand. Di vê romanê de navê xwe yê rasteqîn bi kar anî. Gorbihişt Mehmed Uzunî demekê di rojnameya "Kurdistan Pressê❞ de beşa kurdî amade dikir. Ev rojname bi kurdî û tirkî bû. Hevdîtin û hevnasîna min û wî ya rû bi rû hingê pêk hat. Min hingê dest bi nivîsîna kurdî kiribû. Nivîsên min ên kurdî û kurteçîrokên min di rojnameya “Roja Welat”î de *paşê di rojnameya "Hêvîya Gel"î de û di kovara "Berbang❞ê û kovara “Hêvî”yê de derdiketin. Ev hersê weşan jî li Ewropayê dihatin çapkirin. Dema li Swêdê/Stockholmê rojnameya “Kurdistan Press❞ê dest bi weşana xwe kir, min ji bo alîkariya beşa kurdî nivîsên kurdî ji rojnameyê re dişandin.